Placebo

Placebo é unha banda de rock alternativo formada en Londres (Reino Unido) a mediados dos 90, e integrada polo cantante e guitarrista Brian Molko, o baixista e teclista Stefan Olsdal, e polo batería Steve Forrest (que substituíu a Steve Hewitt en outubro de 2007). Acusando fortes influencias de bandas e artistas como Sonic Youth, David Bowie, PJ Harvey, Nirvana ou Smashing Pumpkins, Placebo apareceu no panorama musical británico como un grupo fresco, orixinal e diferente ao resto de bandas que por entón triunfaban nas illas británicas metidas no saco do brit-pop.

Ambiguos, glamurosos, románticos e un tanto góticos, a banda desenvolveu un estilo no que fusionan o son guitarrero máis punk co glam-rock, á vez que incorporan ritmos electrónicos en grao sumo sofisticado. A partir destes elementos, a banda construíu un son e unha personalidade propias que os converteu nunha das bandas británicas con máis éxito dos últimos anos. Adaíles do desafío no rock e da liberdade sexual (non en balde emprenderon a súa carreira artística da man de David Bowie), Placebo tamén se distinguen por crear ao longo da súa traxectoria toda unha aura de extravagancia na súa asumida ambigüidade sexual. A imaxe característica do seu líder, Brian Molko, coa súa estética andróxina cargada de glamour e exotismo, foi un dos principais atractivos de Placebo desde os seus inicios.