A trastenda do Aquarium Finisterrae

Esta actividade ofrece a posibilidade de coñecer, da man do persoal técnico do Aquarium Finisterrae, as instalacións necesarias para o control e manexo dos millóns de litros de auga mariña que pasan diariamente polos seus tanques. Inclúe o acceso ás salas de bombeo e de filtración; ao laboratorio; á cociña; ás corentenas; e á sala de cultivos auxiliares. Tamén será unha oportunidade para descubrir os principais recursos que se empregan para manter as condicións biolóxicas e ambientais adecuadas dos seres vivos que alberga o centro. A visita está concibida ademais para responder en directo á curiosidade cidadá sobre o funcionamento do Aquarium Finisterrae.