Rapa das bestas de Candaoso

O que non é máis que un traballo gandeiro rutineiro, a rapa de crinas e colas, a desparasitación dos cabalos e a marcaxe a ferro dos poldros nados no último ano, convértese en Galicia nun espectáculo e nunha romaría multitudinaria. Nas zonas onde se crían os cabalos en liberdade, como é o caso de Boimente, os curros ou rapas das bestas atraen cada ano numeroso público ávido de emocións. O de Candaoso, nunha paraxe desde a que se divisa a ría de Viveiro, illa Coelleira e Estaca de Bares, é un dos máis coñecidos de Galicia.

Como tradición ancestral, os curros manteñen moitos dos ritos da loita corpo a corpo coas bestas para a súa domesticación, e garanten un espectáculo enxebre, enchido de forza e de emocións, arredor da bravura dos homes e da furia dos garañóns. O duro traballo dos gandeiros vese recompensado co viño, as empanadas e todo tipo de viandas que se preparan polo contorno do curro ao son das gaitas, e o desfrute das tradicionais carreiras de cabalos en diferentes categorías.

Fuente: https://www.turismo.gal/axenda-cultural/evento?langId=gl_ES&nid=37737