Concerto do grupo Malvela: O Benquerer

 O grupo de cantareiras de Mos, amadrinado por Uxía Senlle, presentou o seu quinto álbum "O Benquerer" no Centro Recreativo e Cultural de Torroso. É un canto de amor á súa terra, o Val da Louriña. Orgullosas de seren de onde son, da súa orixe rural e de predicalo ao mundo, chegan con ilusión renovada e moitas ganas de que gocemos coa nosa música.  
Traen nas mans novas composicións, coplas populares e pezas tradicionais adaptadas á nosa realidade cotiá. "Regresamos con moito ánimo para encher os campos das festas, auditorios e teatros coa nosa alegría e enerxía de sempre. Muiñeiras, malhao, rumba, xotas e pasodobres para non deixar que o corpo pare e unhas letras onde reivindicamos ser mulleres e voces libres, dunha idade que xa nos permite ser quen somos, sen medias tintas, e cantar na lingua que é nosa, aturuxar, bailar e contar a nosa vida a través das cancións que nos retratan e nos representan." 
Somos dunha tribo que resiste e insiste na felicidade e no benquerer. Homenaxeamos as nosas nais, a "estrela" Rosalía, o amor libre, o feminismo, o humor e a emoción, sempre tan presentes nas coplas de Malvela. Incorporamos novos músicos ao grupo, que lle aportan a súa experiencia e bo facer. Rescatamos pezas tradicionais, mais este disco é maioritariamente autoral, de xente do noso entorno. 
 Música con enerxía para que os cantos tradicionais, eses que elas aprenderon de corrido á vez que nenas, sigan facendo festa, a ser patrimonio vivo de todos e todas, a engaiolarnos coa súa beleza e o seu ritmo. Malvela son un grupo moi popular en Galicia, queridísimas e con gran prestixio entre os programadores de música de raíz.  
Concerto de Malvela 
 Cando: Domingo 30/06/2024 ás 19:30 h. 
 Onde: Auditorio do Centro Sociocultural Ágora, Lugar Agramela 17, 15010 A Coruña 
 Prezo: De balde. Non se precisa reserva previa nin retirar billete de entrada. 
Este concerto, como todas as actividades de "Agra no Ágora", é de acceso libre e gratuíto. O programa está financiado polo Concello da Coruña e deseñado en colaboración coa Asociación veciñal Agra. 
Organizadora: Asociación veciñal, cultural, deportiva e recreativa do barrio da Agra do Orzán "Agra" 
 Contacto: agra@galizacultura.ga 
Non volo perdades! Vinde gozar con nós desta marabillosa experiencia musical!