Xulio Maside. Parellas

Aínda que nacido en Vigo en 1933, Xulio Maside vive desde os sete anos en Compostela na casa familiar da Rúa do Vilar nº 42 á beira do seu tío Carlos Maside.
	O ámbito en que transcorre a súa infancia e mocidade tivo que suscitar nel a curiosidade pola pintura, como el mesmo afirma no ensaio A miña lembranza de Carlos Maside. Débelle ao seu tío o ensino da conduta moral, o comportamento cívico, e a súa fidelidade e amor a Galicia, a transmisión da súa bagaxe intelectual así como o contacto diario co traballo do pintor no estudo, a correcta utilización das técnicas e o prematuro coñecemento das vangardas. Carlos déixase sentir nos tanteos iniciais e nas primeiras paisaxes, pero Julio que debuxa desde que pode soster un lapis na man, vai madurando independentemente desde o punto de vista formal e conceptual. Cores, liñas e manchas van configurando a súa estética persoal. Homes e mulleres representados xunto a uns determinados motivos (gatos e cabalos, cobras e cabalos, os cans, o espello, os dados, grandes paxaros e pajarillos), son elementos icónicos que dan á súa obra a autoría que a caracteriza. A miña paisaxe é a figura humana di Xulio Maside, posición que defende na composición dos grupos, nas parellas, nos tríos, nas danzas, nos retratos, nas sombras e figuracións.
	A Fundación Eugenio Granell acolle para esta Exposición unha selección da súa obra que abarca de 2014 ata 2021, despois da gran retrospectiva celebrada no Auditorio de Galicia, en 2014, baixo o comisariado de Mercedes Rozas.
	A presente Exposición está composta de preto de setenta pezas que titulamos: As Parellas. A peza de gran formato ?Luci e máis eu? de 2014, quere ser representativa da mostra xa que concilia obras anteriores coas posteriores que parten dela, con distinto formato e entidade. Compoñen un conxunto de pinturas emparentadas en ritmo e poesía, erotismo e humor. Acrílicos, colaxes, acuarelas, carboncillos, debuxos a man alzada, óleos de mediano e gran formato, dan conta do mundo de Xulio Maside, dos sentimentos máis líricos e musicais en tempos de confinamento e pandemia. A historia do ser humano e a súa grandeza.

Fuente: https://www.turismo.gal/axenda-cultural/evento?langId=gl_ES&nid=89524