Alberto Gende. Encher o baleiro

Había ben tempo que non podiamos asistir a un acto cultural tan multitudinario coma a inauguración da exposición Alberto Gende. Encher o baleiro, pero a situación sanitaria por fin o permite e o certo é que a ocasión pagaba moitísimo a pena. Porque, coincidindo co seu décimo cabodano, Alberto Gende volveu a estar entre nós a través da exposición e do libro que recollen a súa obra, das palabras que lle dedicaron o seu irmán Juan Félix; o concelleiro de Cultura, Marcos Trigo, e o alcalde de Carballo, Evencio Ferrero; estivo presente a través da música de Chicharrón e Rosalía Fernández Rial, e das lembranzas dos familiares e amigos que encheron a sala que leva o seu nome.