Pontevedra en América, unha mirada en femenino

Pontevedra marca para as trece mulleres aquí representadas unha parte importante da súa experiencia vital, ao mesmo tempo intimamente inserida nas súas vivencias en terras americanas, en países como Brasil, Cuba ou Arxentina.

O tempo transcorrido en Pontevedra e o vivido en América, aínda que distintos en época, duración, circunstancias persoais, constitúe o principal nexo de unión entre as mulleres desta antoloxía. Para unhas América constitúe o seu lugar de nacemento, que moi pronto se compatibiliza co universo incorporado na emigración familiar aos países de destino (A. Miranda, N. Piñón, L. Lores, T. Táboas), outras manterán igualmente unha intensa e prolongada vivencia naqueles países (I. Barreto; M. Arauxo, J. Sabor, I. Gómez, V. Pereira) sendo noutros casos a estancia máis curta, (M. Vinyals, E. Colmeiro, M. Villaverde, M. Ruibal) e non con todo menos intensa.