Danza e espiritualidade

Porque cada ano desaparecen espectadores das programacións de artes escénicas, Branca Novoneyra e Isabel Cuesta decidiron organizar este ciclo de lecturas na biblioteca para divulgar a arte do movemento entre persoas interesadas na lectura e na danza. 
Isabel Cuesta é coreógrafa e xornalista. O seu libro El cuerpo que compone gañou o Premio de Investigación en Danza de la Secretaría de Cultura de Bogotá (Colombia).  
Branca Novoneyra é autora do primeiro libro escrito en lingua galega sobre a danza contemporánea Unha introdución á danza contemporánea. A nova danza galega (2012). Como coreógrafa relacionou poesía e danza e no eido da educación artística mantivo o Laboratorio de Movementos, un estudio dedicado á pedagoxía da danza en Santiago de Compostela no que impartiu aulas xunto a Bárbara Monteagudo, Mónica García ou Kirenia Martínez, entre outras bailarinas e pedagogas.  
Durante catro sesións empregarán documentos textuais e visuais para convocar a presenza da danza na biblioteca. Lerán textos escollidos que relacionan a arte viva conectada con diferentes manifestacións de diversos eidos como son o activismo, a saúde, a filosofía e a espiritualidade.  
Nesta última sesión, Danza e espiritualidade, falaremos sobre a posibilidade de achegarnos a dimensións expandidas da conciencia a través da danza. Fundarémonos na seguinte proposta: posicionar a conciencia no corpo e non na mente; o corpo como a autoridade que toma decisións e non a mente. Falaremos de tres elementos: afección, intuición e visualización. Traballaremos para isto co texto da coreógrafa Isabel Cuesta. 
No salón de actos. A entrada é libre ata completar a capacidade da sala.